Kuhayang nyundakeun urang Sunda

Rada noron puguh ge nu ngahaja nulis dina “Pikiran Rakyat” ngeunaan urang Sunda, ti mimiti tulisan Muradi, “Menanti urang Sunda memimpin bangsa”. Ditema ku Atip Tartiana, “Jangan Mimpi Orang Sunda Jadi Pemimpin Bangsa”, malah nu pangakhirna. H. Rachmat M.A.S, “Ubah Mimpi Jadi Kenyataan”, bari ngasongkeun jalan, diantarana sangkan “Pikiran Rakyat” leuwih mindeng atawa paling copel ngamuat artikel nu ngagunakeun basa Sunda.
Anu jadi jejer carita dina sababaraha artikel anu ditataan bieu, hayang geura ningali cenah, pamingpin bangsa teh, jolna ti seke-seler Sunda, malah ceuk Ceu Popong mah kapan, mun aya teh cenah pamingpin bangsa teh anu nyunda, keun bae bari nyantri ge, sangkan jadi kareueus umumna warga Jawa Barat, ulah noyod bae, jiga badak Cihea urang Sunda teh.
Aya salah sahiji cara, sangkan hiji jalma ngajaul kamampuan nu aya dina jero dirina, nyaeta “sigeung atawa todel harga dirina”, contona, leuleutikan di lingkungan urang we heulaanan, kapan meh rata dimana-mana, mun warga lembur urang rek ngistrenan atawa rek ngangkat Ketua RT, itu-ieu sarua pada kekepehan, nyebut embungna teh beak karep, malah teu aneh mun aya warga tibatan daek jadi Ketua RT teh, kajeun pindah imah we cenah, ku embung-embungna eta teh, tah mun umumna warga lembur geus nepi ka kitu, kari todel harga dirina, lamun pada embung mah, urang angkat we nu jadi Ketua RT, ku “Babah Kim An” nu dagang endog di Pasar, da ngagurinjal kaluhur urang Sunda teh dikitukeun mah, basana ge pan :”Tibatan dipingpin ku si Encek mah, akang ge sanggup keneh”. Eta nu kahiji.
Conto sejen, partey badag di urang kamari, waktu nangtukeun calon legislatifna, kapan sakasampeurna pisan, teu aneh ceuk beja, si Ucok nu jadi tukang tambal ban, jadi pindah hulu pindah tampian, sanggeus kaparengkeun jadi anggota legislatif mah, sanajan kadituna, badis we lir jojodog pindah ka salu. Mun geus kitu, piraku Ki Sunda teh rek angger bae noyod, teu malire ka sisi ka gigir.
Jadi mun kamari digugubrag, “geura tanghi”, ayeuna mah kari prakna, ceuk Ayi Uyan dina “Pasosore edas” mah cenah, deeer ah.